دوره بياوبس ساجناري

ناوس مرمو:

ياران چه ناوس

پا وقت از  لوام خيو بيم  چه ناوس

چه سر كت ملوم  پي ملك  شاروس

چه دون ناوسا  خالي موم  چه پوس

هر كس ميلشا  چنيم  بودي دوس

پاديدار  از  ژنو  بو  انوس

مبو  بلو پي  خاك  مورزدينا  بسوس

و پيرالي چمدارا  مبو  بو  پابوس

چا پرديورا آي  پريمن  دوس

لاوه ازه نا  سيد محمد جلوس

بلاردي  چه ليش نوياني مايوس

آنه  مزانو  ها ماوام  چه كوس

ياران  مودي تفر تيونا و طوس

آوقت دنگ يار  برز  بو چوين  ناقوس

بيان بنيشان  خالصو  خلوص

هر كس بواندي راي يار چون خروس

 

قاضي مرمو :

شاه چي و سّرا

ياران  چه ناكام شاه چي و سّرا

ويش پنهان كرد چوين دلي درّا

غلامان كردشان و چراي چرا

نه شون خواجام  درونشان  گرا

ديشان  بيسودن  اي قالو  قرّا

ساكت بين  چه بانگ  سان  سرد  سّرا

ياران  و  ويرم

واده  شاه ني دم  آمان و ويرم

پي ديدار شاه زارو زويرم

واده شاه  يانه پيرالي ديرم

تا و دس يار بكو دسگيرم

بلمي  پي موردين  پا  يانه  ميرم

پيرالي  پيا  كرمي  هر كو  بو گيرم

پي ديدار دوس  بريندار  تيرم

شاهم صيادا  من چوين  نخجيرم

 

حمزه مرمو :

پي ملك موردين 

وريزان بلمي پي ملك موردين

شاه واده شان  دا  چه آ سرزمين

يانه  پيرالي  رژياون   يقين

مو هر پيرالي  پير روشن بين

بزانو  كون ماواي شاه دين

 

صالح مرمو:

يانه پيرالي

هن چه موردينا نوه  باوالي

شاه وادش دادن  او  يانو مالي

گشت بيان  بليم  هر يك چني  هم

بلمي  پي يانه  پيرالي  در دم

آما  و يادم قول  شاي  سر جم

ها پيرالي نان  ناز  رواي  كاوم

بليم  وپا بوس  پير  صايو  چم

شايد  بلاليم  چه ليش  و قسم

تا پيدا كرو  شون  شاه  نه جم

پيداش مكرو و شادي و خرّم

 

قمري مرمو:

پري شاره زوير

بيدي تا بلمي  پري شاره زوير

بلمي پي ماواي  موردين  و ضرور

يانه پيرالي  رژياون چه نور

بلمي و پا بوس  صايو ذاتو  زور

پا لالو  تكا بلمي و حضور

تا شون  خواجا  بودي و پي جور

بگيلو  زمي  تا  و سماي  نور

 

بنيامين مرمو :

پيرالي واده

پادشاه و تومان دادنش واده

وادش  او يانه  تومان  پي داده

فرماون  مر تو  بزاني قاده

فرماش  پيرالي  و از  اولاده

ايميش آمايمي  و اي  درگاده

بلو  پي جوياي  شون شاه زاده

حكم و توشان  شاه ويش  نهاده

غلامان  رجاشان  پي راي مراده

ديده  شان  و روي  خواجاشان  شاده

 

پيرالي مرمو:

ياران و يانه

فري وش آماين و جاگو يانه

هر امريتان  هن او ديده و گيانه

پا روي  ديده و  دل  مكوم  اجرانه

ازيش كمترين  جه غلامانه

تمناي  ديدار سلطان نانه

چاگاه كه  امرش و من  فرمانه 

مگيلوم  پريش  ارضو  سمانه

اگر ميلش بو  ويش  كو  عيانه

مژده ماوروم  پي تان  و يانه

ار من  پيدام كرد  شاه  چه سّر خانه

 

بنيامين مرمو :

وريز  پي هر كو  ملي  سا بلو

وشون خواجام بكر جستجو

 

پيرالي مرمو  :

ياران انتظار

ياران  به نيشدي ني دم  انتظار

چه موردينا هر  پا  اي   اقرار

تا كه  بگليوم  ديار  و ريار

بزانوم  چه كون  شون  خاوندكار

 

بنيامين مرمو :

پيرالي  چمدار

نو دمدا  لوا  پيرالي چمدار

بالدا و  همدا  چوين  طير  طيار 

هفت طوق  زمي  و سّر  چي  و  وار

ديش  كه نيشته  نش  شاه نه  ساج نار

نه ذوق شادي نگردش قرار

تن پكاوه  برق گرد ساج نار

وتاو پرشنگ  كوره آتش بار

هور گيلا  و پس  پيرالي چمدار

مزگانش آورد  پي ميردان  يار

ميردان نو دمدا  كل  بين  هوشيار

 

پيرالي  مرمو:

ياران مزگاني 

ياران پريتان مدوم مزگاني

چوار قرنه  جهان  ها از گيلاني

 چه برّا  لوام  تا و  بحراني 

هفت طوق جه سّر  چيم او  درياني

ديم كه شاه  نيشتن چني  ياراني 

نيشتن  ندلي   ساج  گراّني

ويم  دانه  آ  گر   شوله  ناراني

نتوانام  بلوم  و خدمت   شاني

ايستا  پنه تان  مدوم مزگاني 

مر بنيامين  پير شرط  ناني

بلو و خدمت  شاي  دو جهاني

 

غلامان مرمو :

پيره رنج برده 

بنيام توني پيره رنج برده

قسم تو  وناز  آ  قول و  شرطه

پري آ اقرار  ناووست  كرده

وشون  پيراليا  هرده و هرده 

بلو  پي  جوياي  نزاد  نمرده

تا كه بويني  جه قلو  نرده

شام و ساج نار تشريفش برده

 

بنيامين مرمو :

ياران اقراري

مكي  پري تان  شرطو اقراري

از  و شونه پاي   پير  چمداري

ملوم  پي جوياي  شاي  خاوندكار

گيليام چه  زمي گو شو  كناري

هفت طوق جه سّر  لوام  او واري

شون شام بردن  او دريا  باري

ديم  كه شاه  نيشتن ندلي  ناري

وينه  پروانه  جويا  پي ياري

سرمست بيم  و شوق  آ شهسواري

ويم فرّ دا  چه توي  آ  ساجناري

و  امر مولام  شاي  صاحب كاري

آير  پري من  بي  و  گلزاري

داخل بيم  چني  ميردان ياري

نه گره  گرمشت  آيرو  ناري

هر چا  پيشانيم  آو  مويا  جاري

واتم  از  و فدات  شاي  خاوندكاري

روشن كر پي يار  شرطو  اقراري 

تا ميردان  بزانان  راگه  دينداري

 

سلطان مرمو:

بنيامين اقرار

ايستا  وادمن  پي شرطو  اقرار

مبو  آ ياران  چه  ازل  طيار

كل جم  بيوسان  نه ساي ساج نار

بيان بنيشان و گردن لار

تا كه بوانمي  راي  شرطو  اقرار

 

بنيامين مرمو :

غلامان  درگاه 

كل حاضر  بودي  چي  بره و  درگاه

چني بنيامين  ويم اقرا  نياه

دس اقرارم  و پير شرط  داه

ايستا  وا ده شن   باورمي و جاه

راي  دين  ياري  بكروم  احيا

 

غلامان مرمو  :

آقاي غلامان

سلطان كونين  آقاي غلامان

اگاي  هر دو سر رهنماي  راهان 

اميدن  بوخشي  بار  گناهان 

جمله جه درگات   ايدن رجامان

قويل بكري  عرضو  ثنامان 

دين يار اظهاربدري  سامان

تا  پوخته كريم  كردار خامان 

بگيرمي او دس دليلي دامان 

ايدن رجامان امان صد امان

 

سلطان مرمو :

ياران  قويلا

رجاتان  چني بنيام  قويلا

واده  آ  اقرار  كوي  سر انديلا

اقرارم  چني پيرو دليلا

هر چي بواچين  پنم  اصويلا

راي ياري پريتان  سمو قنديلا

كل بلدي و دشت  و گشتو  گيلا

هركس  قرواني  هر چيش  وصيلا

باورو  و جم  و لالو  نزويلا

تا كه پيرالي و از وكيلا

دواشان  درو  هاويش  ماسويلا

ياران كل  بودي  دسو  دخيلا

 

غلامان مرمو:

نيه نمان  قدرت

يا شاه  نه حضور نينمان قدرت

هر چيت  فرماوي  شاي  صايو حكمت

نه فرمان تو نوياني قفلت

ايستا ني  پاي  ساجو  حرارت

قدرتمان  نين بكريم  خلقت

اميدواريم  ويت ويك اشارت

هرچي  رضاتن  و ميلو رغبت

باوري  و وجود  چا توي كارخانت 

تا ياران  بوينان  سكو نيشانت

 

سلطان مرمو :

غلامان نگاه 

منواردي پيتان  مكري نگاه

هر چي بوازمي  و اذن  ويماه

چه كان سّر دا مكروم پياه

هر كس وريا ون مشناسو كالا

ارماي ويمن  هر چي مبو  باه

چا بنيامينا  جوز  مبو  ايجاه

داود حوالش  كله  زرده  يا

پير موسي  قوچي مو و كرده  ياه

ها توشتيري  هن پري مصطفا ه

رمزبار گردش  باردي  و درگاه 

كردار  ابراهيم  و خروس  بيا

انارميش  پري  يادگار  قرار داه

تمام باوردي  به نيردي  وي  جاه

 تا چني همدا  بدروش  دعاه

 

بنيامين مرمو:

وهفت  سردار

چاگاه فرماوا  و هفت سر دار

ايويش هر كامي كرداري  بارا

عابدين كل بز  آورد  نه  شارا

پير رستم  خربزش جه بوسان  بارا

نريمان بادم  باره  چا  دارا

اسكندر  نواتش پيش  مدارا

موسي سياوه  بلو چا سر تشارا

آما  ساواوه  باردي  ديارا

دس كره  چاتوي آو  و جو  يارا

مايش  جه اصلن نمو خراوا

 

بنيامين مرمو :

وهفتوانه 

چاگاه  فرماوا  و هفتوانه

بلدي  باوردي  هر يك قروانه

به  نيردي  و جم  پري  نيشانه

تا دعا بيرمي چني آ قروانانه

سيد محمد گندم  آورد  چه يانه

سيد ابوالوفا نخون  نيشانه

باويسي ذرت  چا آ  همانه

مير  نوقل  باردي  چا  خرمانانه

برنجيش كردار پي  مصطفا نه

سيد شابدين نيسكش  دريانه

سيد حبيب  شاه  چه آ  ماشانه

كردشان  و قاويت آ  هفت  دانانه

گوش كران چه جام آ چل  تنانه

آ چل تنانه  هر چل  يكانه

چا  گاه  چه  كرم شلطان  فرمانه 

كي  برّي  چه خيو  آماو  ميانه

ناوش ذوالفقار  چه آ دونانه

برّيشاني  سر  آ  قروانانه

ذوا لفقار  چه نش   دو ذات  مهمانه

موسي  شياوه  و  كاك  مصطفا نه

مامورن  پري  قوضه  روحانه

آ  تيقش  چه ذات  خواجاي  سلطانه

پي قهرو  غضو  ها و  دستانه

چا  گاه  حاضر بي آ قروانانه

سلطان  فرماوش  پيرالي  گيانه

بدر دعاي  تيغ چه  از صلانه

پيرالي نو دم دعا  تيغ وانا

موسي سياوه سرشان   برّانا

بدروش  و گر  آ ساج  گرّا نه

تا  پوخته  بودي  آ آي  كردارانه

خواجا و كرم  گردين   حيوانه

آ  جانورا ن  چني  مورو  مارانه

كل بوان  حاضر چه اي  مكانه

بششان  گره كا نا  نانويچو نانه

بي بش  مكردي  پيشان  درآ نه

سلطان مرمو:

بنيام  باوره 

پري هرياري يك  بش  باوره

پوختش بكرو چا  گرّه  خوره

آ نختينه شان  تمام بش  كره

بلو  پيرالي  دعاشان  دره

هيچ كس چي جمه بي بش مكره

تا كه كردارت  چا پرديوره

موسي بنويسش چه آ دفتره

 آ حوين  دارانه  كه برّياشان  سره

يوي چه  ليشان  حرامه  جيا شان كره

باچه و ياران  چه ليش نوره

آنه يش  پري  واردن  خارو   خطره

نيشانه  پري  يوي  حرامتره

روخله شانه  زاله و   زا ورّه

طال و  گني  شان چني  نيرينه  نرّه

آ  حرامانه   برشنان  چا  دشتو  دره

تا بعد از  دعاي  بوران  هر چا  حاضره

پي گاومي حرام آ  مغز  سره

هر پا خاميه  چا  كله  درش  باوره

بدروش  و رستم   بوروش  و دره

چا توي  چالي  دفنش  بكره 

تا  وروي  حساو   چه آ محشره

كردار  كردش هاو  نظره

اجرش  موينو آ  مغز سره

 

بنيامين مرمو :

يا شاه  صلاتن

اختيار دارني  هر چي صلاتن

ازم كمينه  و خاك  پاتن

راضي  به  رضات  هر چي  رضاتن

پا طوره فرمان  و ازي  داتن

تمامي  و ميل لبيكم واتن

ايساته  واده  جمو  دعاتن 

قروانان  حاضر  چه آ درگا تن

اذنم  گركاه  ار بو صلاتن

ياران  جم كري  هر چه نه لاتن

بيان  بنيشان  ني جمو  راتن 

سلطان مرمو:

بنيامين و جم 

باچه و ياران  بيان  به نيشان و جم

عابدين  فرّاشا  داودا  خادم

پيرالي  بچردي  حاضر  نه ور چم 

چني توو به نيشدي  آي  ندلي  جم

پي دواي  آ كردارانه  بودي و سر جم

پير موسي  حاضر  كرا  دستش و قلم

بنويسو  اي  كردارانه  و بي كسرو كم

هر هفت خليفه خلاصه محرم

چه لاي  يك  بودي حلقه كن محكم

آ  گوشتو  سقانه  جيا كن و هم

بپيچان  ناچه  هم چني  نويچم 

و سنگ و ميزان  بي زياد و كم

هر كس حاضرن چه دلي جم

يكي يك بشي  بيران  چه دم

بسانان آ بشه  گردنشان  بو  خم

 

بنيامين مرمو :

ياران او اقرار

بيان بنيشان ياران او اقرار

امر خواجاما  بوان گردن لار 

دو كنه  زانو  بگيردي  قرار

هم سر هم كمر  بوسان  و زار

چه ذيل  بنالان  چه پروردگار

عابدين  فرّاشا  دودا خذمتكار

ازيش هم چني   پيرالي چم دار

نه سر جم نيشو  ازيش  چه  لا وار

تا  كه بوانو دواي  اي كردار

هر هفت خليفه  خلاصه طيار

 قسمت بكران   كل و يك مقدار

 

داود مرمو:

جم رسيه صلا ه

يا شاه  آمانن  جم  رسيه  صلاه

يا حق آمين وي جمو جلاه

شكرم  هن و  تو  سلطان  يكتاه

سفر جه تون  پّرنگ و نگاه

خانيان كرم جه توشان  درياه

چه ياران  دوير بو  كل دردو  بلاه

آكس منكرن  بودي  مبتلا

يا شاه  جه ياران  كل بودي رضاه

سكه يارستان  بكردي  رواه

ايما  چه  سايت  جه هر دو دنيا

رستگار  كري شهنشاي  آعلاه

 

پيرالي مرمو :

اشاره شانا

و فرمان يار  اشاره شانا

و شرط  بنيامين  پير  ازلانا

ورياي داوود  رهبريش  وانا

و قلم زرين  موسي  نويسانا

وخدمت  كرده  رزبارم  زانا

و قدر  حشمت ها  مصطفانا

وتيغ  برّاي  ابراهيم شانا

و چشمه كوثر  يادگارانا

و ناز  رواي  هفت خانيانا

و ناز چل تن  چني  چلانا

 و ناز  پيران چه اي  بارگانا

و نازاري  ناز آ غلامانا

آ  غلامانه  زرين چوگانا 

وناز  پيران  پير  شاهوانا

ونورو  حرمت  آ  بيو  نانه 

كل  بودي قويل  اي  كردارانه

پي هر مطلوي كريان  اي  قروانانه

مطلوشان  حاصل  چني  مرانا

دردانشان  جه لاي  شاه بو دوانا

وحكم  عزيز  شاي  بي همتانا

بلدي و حضور  قويل  بوانا

 

داود مرمو :

 يا حق و راي يار

 يا حق الله من  از  و راگه  يار

پالا ويچنان  ني  جم و  كردار

اميدن  بوخشو  گناي  گناكار

 

بنيامين مرمو :

از  ودين  يار

 ازيش  ايوالله  من  چه  راي  دين يار

كفران  كل بلدي  ايمان  بو  وسيار

بنده  لواني  و  پاي  گناه و  دار

ايمان  دو و  يار چه  كارخانه يار

هركسي  و پاي  خذمت و كردار

ار خاص  كرده  بو  مودي  رستگار

 ار  نا خالصن  مودي  گرفتار

خواجام  چه ياران  رضاش  بو نه  كار 

و راگو  روشت  رهروان  يار

و سرّ سينه  پيران  هوشيار

بقاي  جاودان  مز مراد  يار 

پيروزي  وراي  سفري و ريويار 

خلاصي  چني  بني  يوان  گيردار

شفا بدرو  شاه و  درده  دار

شادي  كرم  كر  خواجاي  كرمدار 

پا حكم  عزيز  شاي  خاوندكار 

 

         اول و اخر يار